1Th 3 | BDD | STEP | Tutaina Ateni 'oina 'amiyamiya ta 'a'ate'ateyoho weyahimi, 'oinega yalohatotowa ma yagwae, “Timoti 'utauya Tesalonaika ma 'ateluwa 'ebwa 'amiyamiya.”

1 Thessalonians 3

1 Tutaina Ateni 'oina 'amiyamiya ta 'a'ate'ateyoho weyahimi, 'oinega yalohatotowa ma yagwae, “Timoti 'utauya Tesalonaika ma 'ateluwa 'ebwa 'amiyamiya.” 2 Coinega 'iyadaina Timoti yahesumaneyawa, weyahina tauna wete 'aigeda 'ima boda Yehoba 'ina paihowa Keliso tetelina weyahina, 'iyadaina yahesumaneyawa ma 'ane 'i'abihe waiwaiyegomi ma Keliso 'oina wahemisa moisa, 3 ma 'ane sahena 'ami mwauwao 'oidiyega wawe'awe'a. Weyahina miyamwauwedi wasanapudiya 'abehega mabwaiyada talobalobadi. 4 Weyahina mwalo tauma 'amiyamiya ba'idamiyao, ma 'ahepwaila nugeta 'oimiya, nata miyamwauwedi silatu 'oimiya, ta nige bewa silatulatu.

5 Bewa huhuna 'oinega yanuwanuwatuhu hedade, ma Timoti yahewasaeyawa ma 'imi hemisa 'i'ita, ma tetelimi 'i'eweyama, weyahina ya'ateyohowa Seitani 'oina, nata gide 'ebetoho madouna 'i'ebwaegomi ma wawe'a, ma nata gide 'ima paihowa mwalo 'oimiya 'i'abihegala.

6 Coinega Timoti 'itauyawa 'i'itegomiya ma tetelimi 'i'eweyama, 'igwaeya, “Tesalonaikaedi Keliso 'oina sihemisa moisa, ma taudi tohelau moisa, ma tuta mabwaiyana 'ida tauya nugeta 'oidiya sinuwanuwa tuhuyahi ma'idi yaliyaya, ma nuwanuwadi wete si'ita hilegita.” Tauma gide wete nuwanuwama ma 'omi 'a'ita hilegomi. 7 Ciyamayao, bwagana ma'ama mwau, ta 'ama muya, ma hesi 'imi hemisa tetelina 'ahesagoheya ta 'i'abihe yaliyayemaiya. 8 Coinega 'imi toholo waiwai 'ida Bada weyahina 'amnama 'ibwebwe'ana.

9 Coinega 'ima loyauwedo Yehoba 'oina geya sowasowahina 'alolagu, weyahina Yehoba 'oina 'ima yaliyaya weyahimi 'imadou hedada. 10 Coinega nihuwana ma sabwelo 'oidiya 'a'ahwa'ahwanoi madouna ma 'abehega 'ami 'oleya 'a'itahila, ma wete hisa 'ebewe'a 'oimiya simiyamiya 'oidiyega 'a'abihe pa'aligomi.

11 Coinega bewa 'igu nuwatuhu 'eluwa. Nugeta Tamada Yehoba ma 'ida Bada Yesu 'ima 'eda siloina ma 'oinega 'atauyawa 'oimiya. 12 Ta heluwena 'abehega Bada helauwega 'ilohemahegomi ma waboi wahelau hilegomi, ma wete tomota hagadi wahelauwedi moisa, gide tauma 'ahehelau 'esegomi. 13 Ma 'ane 'abwa tutaina 'ida Bada Yesu, ma 'ana tohemisao silatuma, 'omi ma'imi waiwai ta nuwami 'ehaudi, Tamada Yehoba matana watoholo.